Pronari i kafenesë ku iu dogjën duart një shitësi të cigareve, Dardan Bunjaku ka dal me një sqarim tjetër për rastin.
Bunjaku ka postuar në llogarinë e tij në Instagram një fotografi me shitësin e cigareve, duke thënë se e konsideron shok dhe se po të ishte prezent në kohën kur ka ndodhur rasti, nuk do të lejonte që të bëhej një gjë e tillë.
“Pas shumë komenteve dhe keqkuptimeve po e jap edhe një sqarim në këtë post. Po e përsëris që kur ka ndodh ngjarja unë personalisht nuk kam qenë present pasi që edhe Bitën e konsideroj shok dhe nuk e kisha leju me bo një gjë të tillë!”, ka shkruar Bunjaku.
Tutje, Bunjaku ka thënë se nuk është në natyrën e tij që të poshtëroj ose të bëj shaka me asnjë njeri e sidomos jo me personin në fjalë, meqenëse siç thotë e mirëpret gjithmonë në lokal dhe që mundohet t’i ndihmoj me aq sa ka mundësi.
“Nuk oshtë e natyrës tem me poshtru ose me bo shaka me asnjë njeri e aq ma pak për Bitën që e mirëpres në lokal dhe mundohem t’i ndihmoj me mundësit e mija. Nëse do të ishte për famën, nuk kisha dal drejtëpërdrejt të bëh deklaratë me emrin tem dhe nuk do të lejoja që ajo video të postohej në rrjete, meqenëse unë po e kërcënoj Bitën. Prandaj ju kisha lut mos me paragjyku. Këto lloj “shaka” siç e ka bo Bita, i bojn edhe fëmijët e juve dhe është e pamundshme të paradalohen”, ka shkruar Bunjaku në Instagram.
Detaje rreth këtij rasti ka dhënë edhe Policia e Kosovës përmes raportit 24 orësh. Policia ka bërë me dije se ka intervistuar viktimën dhe dy dëshmitarë.
“Rr.Fehmi Agani, Prishtinë, 31.10.2020. Raportohet se pas publikimit të një videoje në rrjete sociale, njësiti i hetuesisë ka intervistuar viktima mashkull kosovar dhe dy dëshmitarë. Lidhur me rastin është njoftuar prokurori”, thuhet në raport.
Ndryshe, në pamjet e publikuara në rrjetet sociale cigarexhiu shihet duke tentuar ta ndalë flakën, ndërsa në sfond dëgjohen pjesëmarrësit duke qeshur me të. Askush nga të pranishmit nuk e ndihmon atë, për t’ia shuar flakët.
