Rajoni i Pejës dhe Deçanit u tronditën sot me dy raste të rënda. Fillimisht një 58 vjeçar vrau një 16 vjeçe dhe pastaj edhe vtën në Vitomiricë afër Pejës. Pastaj, në fshatin Gllogjan të Deçanit, një 19 vjeçare u gjet e vdekur. Kështu brenda një dite ndodhën dy raste të rënda në rajonin e Dukagjinit që shokuan qytetarët.
Ngjarja e rëndë në Vitomiricë të Pejës dyshohet që ndodhi për shkak të një fotografie në rrjete sociale. R.B., 58 vjeçar, kishte ardhur nga Gjermania. Ai kishte raporte të afërta me viktimën A.R. 16 vjece. Kjo për shkak se ai e kishte rritur, ndërsa viktima kishte qenë jetime. Ajo flinte në korridorin e shtëpisë për shkak të kushteve të rënda financiare dhe numrit të madh të anëtarëve të familjes. Nga aty, R.B. e mori mëngjesin e së shtunës dhe e dërgoi në shtëpinë ngjitur. Prej aty asnjëri nuk doli gjallë. R.B. dyshohet që e vrau viktimën dhe më pas edhe vetën.
Shtëpia e dorasit ndodhej ngjitur me atë të viktimës. Të dielën, familja shumëanëtarëshe Rudi hapën të pamën për 16 vjeçaren. Vëllai i viktimës femër, Bajram Rudi, thotë se ngjarja ka ndodhur si pasojë e një xhelozie që ka treguar gruaja e të dyshuarit për motrën e tij.
Prokuroria e Kosovës ka filluar hetimet për këtë rast të rëndë.
“Prokurori i Departamentit të Krimeve të Rënda të Prokurorisë Themelore të Pejës ka dalë në vendin e ngjarjes, me urdhër të prokurorit të shtetit trupat e pajetë janë dërguar në IML për obdukim, gjithashtu janë dërguar edhe ar ma dhe gëzhojat për ekzaminim. Dyshimet e para janë se fillimisht është kryer vrasja e më pas vetëvrasja”, thonë nga prokuroria.
Mëngjesin e të dielës Policia e Kosovës mori një telefonatë. Aty kërkohej prezenca e tyre pasi ishte gjetur trupi i pajetë i një 19 vjecare.
“Mëngjesin e sotëm në ora 06:10, Policia e Kosovës është informuar për një rast, kur ka mbërritur e ka gjetur një trup të pajetë. Vdekjen e ka konfirmuar kujdestari i Qendrës së Mjekësisë Familjare. Njësitet policore kompetente e kanë kryer vendshikimin, prokurori ka urdhëruar që trupi i pajetë të dërgohet në Institutin e Mjekësisë Ligjore. Viktima është rreth femër rreth 20-vjeçare. Këto janë informacionet që ne i posedojmë deri më tani”, ka treguar Gashi.
Ndërkohë më vonë për rastin shkroi në Facebook edhe kryetari i komunës së Deçanit, Bashkim Ramosaj.
‘’Me shpresën që qytetit tonë të mos i ndodhin më vdekje të tilla, nga zemra ju shpreh ngushëllimet më të sinqerta familjes Mehmetaj, zoti ua lehtësoftë dhimbjen!’’, ka shkruar Ramosaj duke shprehur ngushëllime për familjen e të afërmes.
19 vjeçarja ishte studente e shkëlqyer në Universitetin e Pejës. /Express/