Aleanca Kosovare e Bizneseve (AKB) ka ngritur shqetësimin për rrezikimin e rreth 500 vendeve të punës në fabrikën VITA, duke kërkuar nga Ministria e Bujqësisë dhe Agjencia e Ushqimit dhe Veterinarisë së Kosovës (AUV) trajtim të barabartë për prodhuesit vendorë dhe produktet e importuara.
Sipas AKB-së, vendimet institucionale që ndalojnë përdorimin e vajit të palmës në nënproduktet e qumështit për prodhuesit vendorë, ndërsa pretendohet se produkteve të importuara u lejohet përdorimi i tij, krijojnë standarde të dyfishta në treg.
Kryetari i AKB-së, Agim Shahini, ka kërkuar reagim të menjëhershëm nga institucionet përgjegjëse, duke paralajmëruar për pasojat që, sipas tij, mund të ketë kjo situatë për punësimin dhe prodhimin vendor.
AKB-ja ka vlerësuar se siguria ushqimore duhet të zbatohet me të njëjtat standarde për të gjitha produktet, pavarësisht nëse prodhohen në Kosovë apo importohen nga jashtë.
Shahini ka paralajmëruar gjithashtu se fabrika VITA rrezikon ta zhvendosë veprimtarinë e saj në vende të tjera të Ballkanit Perëndimor ose në Turqi, nëse nuk gjendet një zgjidhje për situatën aktuale.
“Mos e ndëshkoni prodhuesin vendor dhe mos e favorizoni importin”, ka deklaruar Shahini.
AKB-ja u ka bërë thirrje Ministrisë së Bujqësisë dhe AUV-së që të ndërmarrin veprime urgjente për të sqaruar këtë çështje dhe për të shmangur, sipas saj, rrezikimin e qindra vendeve të punës dhe dëmtimin e prodhimit vendor.
Deri në publikimin e këtij lajmi, në deklaratën e AKB-së nuk është përfshirë një përgjigje nga institucionet e përmendura lidhur me pretendimet për trajtim të pabarabartë të produkteve vendore dhe atyre të importuara.