Tre persona janë lënduar si pasojë e një aksidenti mes tri automjeteve që ka ndodhur sot rreth orës 16:40, në rrugën “Enver Maloku”, në Prishtinë.
Lajmin për Gazetën Sinjali e ka konfirmuar zëdhënësi i policisë për rajonin e Prishtinës, Agron Borovci.
“Sot rreth orës 16:40, në rrugën ‘Enver Maloku’, në Prishtinë, është raportuar për një aksident rrugor në mes të tri automjeteve. Bazuar në të dhënat fillestare nga vendi i ngjarjes, si pasojë e këtij aksidentit, ndihmë mjekësore kanë kërkuar tre persona”, tha ai.
Borovci bëri të ditur se në vendin e ngjarjes ka dalë Njësia Policore e Trafikut, e cila ka nisur një hetim lidhur me shkaqet që kanë sjellë deri te ky aksident.