Mbrëmë në mesnatë është sulmuar fizikisht gazetari Visar Duriqi, autor i emisionit hulumtues “Indoks”.
Sulmi fizik ndaj tij është bërë nga tre persona ende të panjohur. Tre persona e kishin pritur gazetarin Duriqi, para hyrjes së banesës së tij.
Ai është sulmuar posa ka dalë nga vetura e tij.
Në këtë kohë Duriqi kishte qenë duke u kthyer në banesë, pas pjesëmarrjes në debatin televiziv Politico, në Kanal 10.
Dhëmbë dhe hundë të thyer – lëndime të rënda trupore ndaj gazetarit hulumtues, Visar Duriqi (Pamje të rënda)
Gazetari Duriqi ka marrë lëndime dhe është trajtuar mbrëmë në Emergjencën e QKUK-së.
Policia ka dalë në vend ngjarje dhe është duke e hetuar rastin.
Gazetari Visar Duriqi shquhet si njeri prej gazetarëve më të guximshëm në Kosovë. Si autor i emisionit “Indoks”, ai ka trajtuar dhjetëra tema të rrezikshme në të cilat janë të përfshirë mafioze, të korruptuar e kriminelë të ndryshëm.