Kamionët e kompanisë “Ma.con” po e vazhdojnë punën në gurëthyesin, në fshatin Cerrcë, të Komunës se Istogut.
Rreth 300 metra është distanca nga kjo pronë publike e dhënë për shfrytëzim kësaj kompanie me selinë e kompanisë.
Ky gurëthyes është bërë shkak që kryetari i Komunës së Istogut, Haki Rugova, të hetohet e më pas të ndalohet për 48 orë nga Prokuroria Themelore në Pejë, raporton KOHA.
Nga 5 hektarë të shfrytëzueshme kompania e vëllezërve të kryetarit Rugova, 2.8 hektarë punohet me gurëthyes.
Njëri nga aksionarët e kompanisë, Ismet Rugova, ka thënë se procesi i dhënies në shfrytëzim të pronës për gurëthyes është plotësisht në pajtim me ligjin.
“Pra Hakiu akuzohet që e paska deleguar tek nënkryetari nënshkrimin e kontratës me kompaninë Ma.Con për shfrytëzimin e pronës. E ka deleguar sepse ka qenë konflikt interesi për të nënshkruar me ne kontratë, ndërsa procedura për dhënien në shfrytëzim të pronës komunale, janë zhvilluar të gjitha konform ligjit. Ka zgjatur 2 vite procedurë. Është shpallë interesi publik, është shpallë ankandi publik për dhënien qira të tokës. Kemi konkurruar ne, ne kemi qenë ofertuesit me të shtrenjtë”, është shprehur ai.
Prokuroria Themelore e ka arrestuar kryetarin e Istogut dhe dy zyrtarë të tjerë javën e kaluar për disa vepra penale.
Megjithatë, siç ka mësuar KOHA, krejt procedura ka nisur nga Agjencia e Pyjeve të Kosovës, e cila është në kuadër të Ministrisë së Bujqësisë.
Për tri ditë nga ky institucion nuk kanë kthyer përgjigje. Burimet i kanë thënë KOHËS se Agjencia e Pyjeve të Kosovës ka me shumë se një vit që ka iniciuar në organet e drejtësisë dyshimet se kësaj prone publike, që ishte zonë pyjore, i është ndërruar destinimi në atë fushore.
Për shqetësimet e Ministrisë së Bujqësisë, në kompaninë “Ma.Con” kanë thënë se janë në dijeni, por pretendojnë se nuk ka pasur ndërrim destinimi.
“Nuk është e vërtetë që i është ndërruar destinimi. Ju mund të shkoni tek vendi dhe ta shohin. Ne kemi shfrytëzuar 2.8 hektarë edhe pse kemi marrë në shfrytëzim 5 hekatarë, por kemi shfrytëzuar vetëm pjesën gurore”, ka thënë Ismet Rugova.
Kryetari Rugova është në masën e arrestit shtëpiak prej një muaji. Edhe dy të arrestuarve të tjerë Gjykata Themelore në Pejë nuk ua ka caktuar masën e paraburgimit.