Delegacioni i Kosovës i kryesuar nga kryeministri Avdullah Hotin ka arritur të hënën në Uashington, ndërsa të premten do të zhvillojnë takimin në Shtëpinë e Bardhë me palën serbe.
Zëvendëskryeministrin Besnik Tahiri, sot gjatë vizitës në Ferizaj është pyetur rreth këtij takimi me ç’rast ka thënë se pret lajme pozitive.
“Takimi në Uashington ndodh në Shtëpinë e Bardhë, ndodh tek një shtet mik që ka qenë dhe vazhdon të jetë afër Kosovës dhe kombit tone. Kam qenë në kontakt me kryeministrin, delegacioni është unik dhe gati për këtë takim dhe shpresoj që nga ky takim të kemi lajme pozitive”, ka thënë Tahiri.
Kujtojmë se kryeministri Hoti në Uashington është shoqëruar nga zëvendëskryeministrat Driton Selmanaj dhe Albulena Balaj, ministrat Meliza Haradinaj, Selim Selimi dhe Arban Abrashi dhe shefja e kabinetit Ardita Dushi.
Shefi i ekzekutivit në Shtetet e Bashkuara ka udhëtuar vetëm me partnerët e koalicionit, pasi që dy partitë opozitare Vetëvendosje dhe PDK iu janë përgjigjur negativisht ftesës së tij.