Kryeprokurori i Prokurorisë Themelore në Ferizaj, Burim Çerkini sot ka mbajtur konferencë për media në lidhje me vrasjen e rreshter Muhamet Lika mbrëmë në Kaçanik.
Çerkini para mediave ka thënë se kur ka ndodhur rasti, i ndjeri po kthehej nga puna dhe në shkallët e ndërtesës ku banonte ai është plagosur dhe nga plagët e marra ka ndërruar jetë.
Ai ka thënë se në bazë të provave materiale, aktin e kanë kryer dy persona dhe janë larguar nga vendi i ngjarjes, shkruan lajmi.net.
“Gjatë punës hetimore, dje dhe sot nga PK janë ndërmarrë shumë veprime hetimore, janë intervistuar shumë persona, dëshmitar, persona që kanë rastis në vendin e ngjarjes, që mund të japin informacione për organet e rendit, si dhe janë ndërmarr të gjitha veprimet për sigurimin e provave materiale që do të na bëjnë neve punën më të lehte. Prokurori kujdestar në Prokurorinë Themelore në Ferizaj, ka qenë në vendin e ngjarjes dhe të gjitha veprimet kanë qenë të marra në koordinim me të”, ka thënë Çerkini.
Ai ka thënë se deri më tani nuk ka persona të arrestuar si dhe ende as nuk janë identifikuar personat e dyshuar.
“Deri më tani nuk kemi persona të arrestuar për këtë çështje penale, ka pas intervista, marrje në pyetje të personave që kanë mundur të japin informacione të rëndësishme, por deri në këtë moment ne nuk dimë arsyen apo motivin që ka quar deri në këtë rast makabër”, ka thënë Çerkini.