Është ndarë nga jeta në moshën 75-vjeçare aktori i mirënjohur, Mirush Kabashi. Lajmin e kanë bërë të ditur familjarët e tij, të cilët nëpërmjet një njoftimi bëjnë me dije se Kabashi ka mbyllur sytë në mesnatë, shkruan Top Channel.
“Të nderuar miq, kolegë dhe dashamirës, me pikëllim të thellë ju njoftojmë se MIRUSH KABASHI ndërroi jetë të martën, më datë 5 dhjetor pas mesnate. Sa u përket detajeve të ditës, orës së varrimit dhe homazheve do ju komunikojmë në orët në vazhdim. Me respekt, familja Kabashi!”, njoftojnë familjarët e artistit.
Mirush Kabashi ka gdhendur dhjetëra karaktere të papërsëritshëm në ekran e teatër, një galerie personazhesh që kujtohen dhe janë pjesë e të folurës së përditshme përmes batutave të tyre. Aktivist i shumë kauzave sociale, zë i fortë i çështjes kombëtare.
Do të kujtohet gjithnjë për artin e tij dhe gjithçka dha në shërbim të tij dhe shoqërisë. Do të kujtohet edhe me shprehjen e tij “Trupin ç’e do, shpirti ka vlerë”. Dy vite më parë u përball në qershor të vitit 2021 me lajmet e rreme që qarkulluan për vdekjen e tij dhe nuk ishte rasti i vetëm. Edhe këto lajme të rreme i trajtoi me elegancë, qytetari duke e pranuar ikjen si një ngjarje jete që një ditë vjen për këdo dhe duke tërhequr vëmendjen për më shumë kujdes, verifikim të informacionit.
Mirush Kabashi lindi më 17 prill 1948 në Shkodër dhe është rritur në Durrës. Artisti shqiptar me origjinë nga Gjakova la pas një trashëgimi të pasur artistike, si aktor i rreth 100 roleve në teatër dhe filma. Ndër rolet e tij të larmishme, më i veçanti ka mbetur ai i Sokratit tek “Apollogjia e fundit e Sokratit”.
Po ashtu, ai ka dhënë një kontribut të madh në filmografinë shqiptare. Jo vetëm kaq, ai është cilësuar si një nga interpretuesit më të mëdhenj të poezisë në Shqipëri.
Që nga viti 2014 mban titullin “Nderi i Kombit”, ndërsa më parë kishte fituar titujt “Artist i Merituar” dhe “Mjeshtër i Madh i Punës”.
Filmografia
* Kronikë provinciale (2009)
* Ne dhe Lenini (2008)
* Nata (1998)
* Edhe ashtu, edhe kështu (1989)/Tch
Për vdekjen e tij ka reaguar edhe kryeministri i Shqipërisë, Edi Rama, Ai ka “>shkruar në Facebook “Lamtumirë Mirush”.