Vdes në QKUK i dyshuari për grabitje në Veternik

I dyshuari për tentimgrabitje që është plagosur më 17 mars në Veternik, ka vdekur të mërkurën në Qendrën Klinike Universitare të Kosovës.

Lajmin e ka konfirmuar shefi i Intensivës, Shaqir Uka. 

“Po, është e vërtetë, pacienti nuk ka arritur t’ju bëjë ballë plagëve që ka marrë me armë zjarri, pavarësisht tretmanit intensiv kirurgjikal dhe medikamentoz. Ai ka ndërruar jetë pak para orës 21:00”, ka thënë Uka për Kohën.

Para nëntë ditësh një tentimgrabitje e armatosur ka ndodhur në hapësirat e jashtme të një qendre tregtare në Veternik. 

Cak ishte automjeti i një kompanie të sigurimit që po bartte para. 

Përveç të dyshuarit me inicialet M.V., ka mbetur i plagosur edhe një tjetër person, pjesë e kompanisë që po transportonte paratë.