Armando Broja dhe Ardian Ismajli do të jenë dy mungesat për Silvinjon në ndeshjen e sotme ndaj Çekisë.
Sulmuesi nuk ia ka dalë dot, pasi ende ndien shqetësime në gju dhe për këtë, siç u konfirmua nga trajneri në konferencën për shtyp, nuk do të rrezikohet. Ndërkohë vendin e Ismajlit, i cili ishte titullar në dy ndeshjet e fundit të ekipit përfaqësues, do ta marrë Arlind Ajeti. Mbrojtësi 30-vjeçar që luan me Klyzhin do të luajë nga minuta e parë pas një viti, ku takimi i fundit ishte me Izraelin në Ligën e Kombeve.
STËRVITJA E FUNDIT- Kombëtarja mbylli dje përgatitjet me seancën e fundit zyrtare, e cila u zhvillua në stadiumin “Air Albania”, aty ku sot në mbrëmje do të luhet ndeshja ndaj Çekisë, një takim shumë i rëndësishëm për kualifikimin në Europianin e Gjermanisë vitin e ardhshëm. Pas konferencës zyrtare për media, ekipi doli në fushë dhe u stërvit për rreth një orë. Përveç Brojës, e gjithë skuadra u stërvit së bashku, teksa ekipit iu bashkua edhe mesfushori Klaus Gjasula. Stërvitja nuk ka pati shumë ngarkesa fizike, me stafin teknik që e fokusoi më shumë seancën në ushtrimet me topin dhe situata të ndryshme loje. Ndërkohë edhe Keidi Bare ka lënë pas shqetësimet fizike dhe do të jetë i gatshëm për ndeshjen e sotme.
FORMACIONI- Sa u përket titullarëve që do të zbresin në fushë, Silvinjo do t’i besojë formacionit që mori një pikë në Pragë, me vetëm një ndryshim për shkak dëmtimi. Duke u përshtatur edhe me karakteristikat e kundërshtarit, “Panorama Sport” mëson se trajneri ka projektuar Etrit Berishën që nga minuta e parë edhe pse me Poloninë e nisi Strakosha. Krahas Gjimshitit në mbrojtje do të vendoset Ajeti, ndërsa nga krahët Hysaj dhe Mitaj. Në mesfushë nuk do të ketë ndryshime, teksa do të jenë treshja: Asllani e Ramadani dhe Bajrami para tyre, ndërkaq përpara do ta nisin nga minuta e parë: Asani nga e krahu i djathtë, Seferi në krahun e majtë dhe Cikalleshi në majën e sulmit.
ÇEKËT- Sa u përket rivalëve, ata pritet që ta nisin ndeshjen e sotme me vetëm një ndryshim nga takimi i Pragës, ku në mesfushë në vendin e Kral është projektuar Sadilek.
