Presidenti rus Vladimir Putin ka thënë se Moska “nuk mund të reagonte në asnjë mënyrë tjetër” në pushtimin e saj në Ukrainë.
Sipas mediave të huaja, përcjell Telegrafi, në një takim me zyrtarët e tij të sigurisë, Putin tha: “Nuk na u dha asnjë shans tjetër për të vepruar ndryshe”.
Ai shtoi: “Duhej ta bënim, sepse rreziqet ishin vërtet serioze për të gjithë ekzistencën e vendit tonë”.
Putin tha se Rusia mbetet pjesë e ekonomisë globale dhe tha se Moska nuk planifikon të dëmtojë sistemin që i përket.
Ai paralajmëroi se partnerët e Rusisë nuk duhet të përpiqen ta largojnë atë nga sistemi ekonomik.
Ndryshe, krerët e shteteve anembanë globit denoncuan me shpejtësi sulmin në shkallë të plotë të Rusisë ndaj Ukrainës – ndërsa presidenti i vendit u zotua të enjten të mos “heqë dorë nga liria e saj” me asnjë çmim.
Presidenti i Ukrainës, Volodymyr Zelensky, sulmoi të enjten sulmet ajrore dhe sulmet e Rusisë ndaj vendit të tij nga tre drejtime, ndërsa shpërthimet tronditën kryeqytetin, Kiev, dhe qytete të tjera. Të paktën 40 persona janë vrarë deri më tani, thanë zyrtarët ukrainas.
Agresioni rus në Ukrainë ka bërë që të mbajnë një takim virtual shtatë shtetet më të industrializuara të botës perëndimore.
Në një deklaratë të përbashkët pas takimit virtual, udhëheqësit e G7 thanë se presidenti rus Vladimir Putin ka “rifutur luftën në kontinentin evropian”.
“Ai e ka vënë veten në anën e gabuar të historisë”, shkruan në deklaratën e udhëheqësve botërorë.