Ministria e Punëve të Brendshme (MPB), ka njoftuar se gjendja shëndetësore e bashkatdhetarëve të lënduar në aksidentin tragjik në Kroaci, është stabile dhe se ata do të kthehen sonte në Kosovë.
“Institucionet e Kosovës në koordinim me institucionet e Kroacisë, kanë organizuar kthimin e bashkëqytetarëve tanë në Kosovë, gjendja shëndetësore e të cilëve është stabile. Ata do të vijnë sonte me transport ajror, pas orës 22:00”,thuhet në njoftimin e kësaj ministrie.
Po ashtu, nga kjo ministri kanë bërë të ditur se Qeveria e Kosovës do të organizojë transportin dhe përcjelljen e tyre nga Aeroporti Ndërkombëtar i Prishtinës “Adem Jashari” deri te familjet e tyre.
“Ministria e Punëve të Brendshme është në kontakt të vazhdueshëm me familjet e viktimave lidhur me procedurat e kthimit në Kosovë të trupave të personave që humbën jetën në aksidentin tragjik të së dielës”, përfundon njoftimi.