Ministri i Financave dhe Transfereve, Hekuran Murati ka deklaruar se sapo ka përfunduar takimin me Këshillin Ekonomik Social, ku pikë e rendit të ditës ishte miratimi i propozimit të pagës minimale në vend.
Murati njoftoi se si Qeveri propozuan që paga minimale të jetë 264 euro, apo 1.5 euro për orë.
Pavarësisht këtij propozimi, sipas Muratit nuk u dhanë votat e mjaftueshme sepse përfaqësuesit e sindikatave nuk e mbështetën atë, transmeton lajmi.net.
Postimi i plotë:
Sapo përfunduam takimin e Këshillit Ekonomik Social ku pikë e rendit të ditës ishte miratimi i propozimit për pagën minimale.
Përllogaritja sipas udhëzimit administrativ që u prezantua para KES ishte 240.2 euro/muaj.
Megjithatë, ne si qeveri propozuam që paga minimale të jetë 264 euro/muaj, apo 1.5 euro/orë, që është në vijë edhe me premtimet tona për pagë minimale dhe për lirimin e saj nga tatimi.
Megjithatë, propozimi nuk morri votat e nevojshme sepse përfaqësuesit e sindikatave nuk e mbështetën.
Kundërshtimi nga ana e sindikatave nuk ka kuptim dhe nuk mund të spjegohet meqenëse asnjë nga punëtorët që ata përfaqësojnë nuk preket nga paga minimale, për shkak se pagat e tyre janë dukshëm mbi nivelin e pagës minimale.
Krejt çka arrihet me këtë mos-votim është se punëtorët e sektorit privat do të vazhdojnë ta kenë pagën minimale 170 euro.