Me kërkesë të ministrit të Punës dhe Mirëqenies Sociale, Skënder Reçica, në mbledhjen e Qeverisë janë ndarë mjete financiare në vlerë prej 203 mijë eurove për shoqatat e kategorive të dala nga lufta dhe për Lidhjen e Pensionistëve dhe Invalidëve të Punës.
Lidhur me këtë mbështetje financiare, si propozues i kësaj kërkese, ministri i MPMS-së, Skënder Reçica, ka thënë se, kujdesi ndaj vlerave të luftës çlirimtare, respektivisht ndaj ushtarëve çlirimtarë, të cilët na bëjnë krenarë sa herë kujtojmë se liria nuk erdhi vetë, është obligim yni institucional.
“Prandaj, mbështetja e kategorive të dala nga lufta kërkon përkushtimin tonë dhe ne tashmë jemi dakorduar bashkërisht me kryeministrin dhe me përfaqësuesit e shoqatave të dala nga lufta që përkujdesja ndaj invalidëve të luftës çlirimtare, respektivisht trajtimi mjekësor i tyre me proteza, nga viti i ardhshëm të rregullohet në mënyrë institucionale përmes institucioneve përgjegjëse shëndetësore dhe Shërbimit Spitalor, Klinik Universitar, sikur që jemi dakorduar që mbështetja financiare për shoqatat e dala nga lufta nga viti i ardhshëm të përfshihet në Ligjin për buxhetin e shtetit”, ka thënë ministri Reçica.
Ai tha se të ndodhur në situatë pandemie dhe nisur nga nevoja për mbështetje emergjente për kategoritë e dala nga lufta, duhet ndarja e mjeteve financiare në shumën prej 203.000.00 eurove: për Shoqatën e Familjeve të Dëshmorëve, Shoqatën e Invalidëve dhe Organizatës së Veteranëve të Luftës së UÇK-së, si dhe Lidhjen e Pensionistëve të Kosovës.
“Ky vendim ka për qëllim përkrahjen financiare të këtyre shoqatave, për shkak të gjendjes emergjente të shkaktuar nga COVID-19 dhe gjendjes po ashtu të rëndë për funksionimin dhe kryerjen e obligimeve të tyre, si dhe mbështetjen për përmirësimin e shëndetit të invalidëve të luftës. Ky fond do të ndahet në kuadër të Fondit për Rimëkëmbje ekonomike”, ka thënë ministri Reçica.
“Këto mjete do të ndahen si në vijim: 17.000.00 euro do të ndahen për aktivitetet e Shoqatës së Familjeve të Dëshmorëve. 34.000.00 euro do të ndahen për mbështetje të Organizatës së Veteranëve të Luftës së UÇK-së; 15.000.00 euro do të ndahen për mbulimin e shpenzimeve për funksionimin e Shoqatës së Invalidëve të Luftës së UÇK-së; 125.000.00 do të ndahen për mbulimin e shpenzimeve për proteza për Invalidët e Luftës së UÇK-së, të cilët e ka gjendjen e rëndë shëndetësore dhe kanë nevojë të domosdoshme për to. Po ashtu me qëllim të mbështetjes për mbulimin e shpenzimeve të aktiviteteve dhe funksionimin e Lidhjes së Pensionistëve dhe Invalidëve të Punës, në kuadër të së cilës funksionojnë 30 organizata komunale të pensionistëve, do te ndahen 12.000 euro”. /EkonomiaOnline/