Nga Ministria e Punëve të Jashtme dhe Diasporës kanë bërë të ditur se janë liruar nga pozita të gjithë ambasadorët që janë emëruar politikisht.
Për KlanKosova.tv nga Zyra për media e kësaj ministrie kanë deklaruar kjo është propozuar nga Ministrja e Donika Gërvalla tek Presidentja Vjosa Osmani.
“Në përputhje me Ligjin, Ministria e Punëve të Jashtme dhe Diasporës (MPJD), ka përcjellë gjatë kësaj jave tek Presidentja e Republikës së Kosovës, propozimin për lirim nga detyra dhe tërheqje nga misioni diplomatik për të gjithë ambasadorët e Republikës së Kosovës, të emëruar politikisht, duke i falënderuar për punën dhe angazhimin e deritanishëm”.
Ndërsa, zëvendësministri i Punëve të Jashtme dhe Diasporës, Kreshnik Ahmeti, për klankosova.tv ka deklaruar se janë liruar 12 ambasadorë.
“Po, janë liruar ambasadorët me çelës politikë, janë 12 të tillë”, ka thënë Ahmeti.
KOHA mëson se të liruarit nga detyra, e që mbanin postin e ambasadorit, janë: Beqë Cufaj, Nait Hasani, Arbër Vllahiu, Lirim Grejqevci, Shpend Kallaba, Gezim Kasapolli, Avni Kastrati, Gjergj Dedaj, Hajdin Abazi, Ylber Hysa, Avni Arifi e Amir Ahmeti.