Llapi ka shënuar fitore ndaj Dritës me rezultat 2-1 në finalen e Kupës së Kosovës në stadiumin ‘Fadil Vokrri’, duke mbrojtur trofeun e fituar një vit më parë.
Stadiumi ka qenë i mbushur kënaqshëm me tifozë të Llapit dhe Dritës për këtë ndeshje, duke dhuruar spektakël në tribuna.
Llapi që në rastin e parë arriti të shënojë një gol shumë të bukur nga goditja e dënimit.
Zhvillohej minuta e 6-të kur mesfushori gjuajti bukur për ta mposhtur portierin Leotrim Rexhepi për 1-0.
Llapjanët krijuan edhe pas golit, por nuk arritën të dyfishonin epërsinë.
Drita u këndell në mesin e pjesës së parë, ku pastaj gjeti edhe golin. Një harkim në zonë gjeti më së miri Hamdi Namanin i cili shënoi me kokë për 1-1 në minutën e 37-të.
Deri në fund të kësaj pjesëloje nuk kishte më gola dhe skuadrat shkuan në pushim me rezultat të barabartë.
Llapjanët e nisën sërish më mirë edhe pjesën e dytë, duke shënuar që në start.
Në minutën e 48-të u krijua një tollovi në zonën e Dritës, ku një top u kthye te Arbnor Ramadani, i cili me një goditje të bukur pak të devijuar shënoi për 2-1.
Llapi ka mundur të shënojë sërish disa minuta më pas, por goditja e Ilir Krasniqit u ndal në shtyllë.
Drita mori dominimin në çerekun e fundit të ndeshjes, por që nuk arriti të barazojë edhe pse kishte disa raste me Muharem Jasharin dhe Marko Simonovskin.
Llapi në fund iu gëzua trofeut të Kupës së Kosovës që është i dyti në histori për llapjanët.