Liverpooli është kampion i Anglisë në futboll. Titullin e Premier Leagues për edicionin 2019\2020, Liverpooli e siguroi të enjten mbrëma, ndonëse nuk luajti.
Falë fitores 2:1 të Chelseat ndaj Manchester Cityt, Liverpooli shpallet kampion.
Shtatë xhiro para fundit, Liverpooli i ka 86 pikë, 23 më shumë se Manchester City i vendit të dytë.
Liverpooli i famshëm, titullin e fundit e kishte fituar në vitin 1990. Tani ka 19 tituj të Anglisë.
Chelsea fitoi derbin e xhiros së 31-të falë një goli nga penalltia në minutën e 78-të. Willian realizoi nga pika e bardhë, pasi penalltia u dha pas rishikimit të situatës në sistemin VAR.
Christian Pulisic kaloi Chelsean në epërsi në minutën e 36-të. Kevin De Bruyne barazoi shifrat në minutën e 55-të. Chelsea renditet i katërti me 54 pikë.
Liverpooli të mërkurën mbrëma fitoi 4:0 ndaj Crystal Palace.