Kandidati për kryeministër i Vetëvendosjes, Albin Kurti, ka thënë se kryeprioritet kanë kthimin në normalitet, në rast se vihet sërish në krye të qeverisë.
Ai ka thënë se meqë ishte në front të luftimit të pandemisë kur u shfaq ajo, e di më mirë se çka duhet vepruar menjëherë, njofton Klan Kosova.
“Dimë më shumë dhe padyshim mundim më shumë. Mbi të gjitha dimë se çka është gabim dhe s’duhet ndjekur më tej. Shërimi dhe kurimi i sëmundjeve s’kanë alterantivë andaj duhet krijuar kushtet. Masat e veprimit të menjëhershëm do të jenë: vaksinimi i së paku 60 për qind të popullatës, sigurimit të qëndrueshëm të barnave dhe testeve, trajnimi i vazhdueshëm i stafit shëndetësor, komunikim transparent dhe i dendur me qytetarë”.
Kurti ka folur edhe për planet në fushat e tjera ku të dytën e renditi ekonominë dhe këndelljen e saj.
“Ka rënie të ndjeshme të prodhimit, vende të humbura të punës dhe rritje të numrit të familjeve në që kanë përfunduar në varfëri. Kthimi i normalitet është kryeprioriteti ynë. Përgatitja e të gjithë neve për një mënyrë të re të të bërit biznes”.
I pari i vetëvendosjes ka thënë se do të shërojnë ekonominë që del nga pandemia, por e cila, sipas tij, ka pasë edhe shumë sëmundje të tjera.
Në këtë drejtim, Kurti ka thënë se theks të veçantë do të vë edhe te gratë duke synuar punësimin dhe mbështetje aktive për ndërmarrësi, si dhe biznese ku pronare janë gratë.
Kurti gjithashtu ka përsëritur se synojnë që mbështetjen popullore ta kthejnë në shumicë parlamentare duke potencuar se sfida është e madhe, por se vullneti edhe më i madh.