Në liqenin e Badocit ka filluar të ketë rënie të vlerave të manganit në ujë, por qytetarët ende nuk mund ta përdorin për pije, kështu kanë konfirmuar Kompania Rajonale Ujësjellësi “Prishtina” dhe Instituti Kombëtar i Shëndetit Publik në Kosovë.
Arjeta Mjeku, zëdhënëse e KRU “Prishtina” tha për Telegrafin se janë duke përcjellur gjendjen, dhe se shpresojnë që gjendja të përmirësohet.
“Ne si KRU” Prishtina” jemi duke bërë përpjekje maksimale për t’i furnizuar qytetaret me ujë te pijshëm përmes autoboteve në zonat e prekura. Jemi në koordinim të plotë me IKSHPK.
Shpresojmë që situata të përmirësohet shumë shpejt dhe jemi në trend të rënies së vlerave te manganit, por jemi duke e përcjellë situatën në vazhdimësi. Gjendja nuk është alarmante
Mjeku tha se me rekomandim të IKSHPK-së po përcjellin vlerat e manganit, po mirëmbajnë fazat e trajtimit, kanë shtuar kujdesin në procesin e trajtimit sipas procedurave standarde operative, kujdes të shtuar në procesin e dezinfektimit, shpëlarja e rrjetit të shpërndarës të gypave magjistral dhe segmenteve të vogla, dhe qytetarëve në zonat në përcjellje te vazhdueshme të iu sigurohet uji higjienik.
Ndryshe, edhe Instituti Kombëtar i Shëndetësisë Publike të Kosovës (IKSHPK) ka njoftuar popullatën se është duke vazhduar monitorimi dhe përcjellja në vazhdimësi e cilësisë së ujit në Liqenin akumulues të Badocit, të destinuar për pije.
“Analizat e fundit laboratorike tregojnë për rënie të vlerave referente të manganit në ujin e liqenit dhe në rrjetin shpërndarës, por që, ende nuk janë arritur vlerat sipas standardeve të parapara në Udhëzimin administrativ nr. 10/2021 -Cilësia e Ujit për konsum nga njeriu”, ka njoftuar IKSHPK.
Ekipet e IKSHPK-së janë në terren 24/7 dhe po bëhen çdo ditë analiza fiziko-kimike të ujit të prodhuar në Fabrikën që furnizohet nga Liqeni akumulues i Badocit dhe qytetarët do të njoftohen me kohë për normalizimin e parametrave referent të ujit të pijshëm.
Reklama
Zonat të cilat mbesin nën përcjellje të vazhdueshme për cilësinë e ujit për pije nga Fabrika e ujit në Badovc janë të njëjtat:
Qyteza e Graçanicës, fshatrat e Graçanices qe furnizohen nga ITUP Badovc, përveç fshatrave që furnizohen nga NJOU Lipjan, Hajvalia komplet, lagjet Veterniku, Lagjet 038 dhe të gjitha të tjerat që gravitojnë në brezin Graçanicë – Prishtinë, pastaj Lagjet Qëndresa, Qëndresa Home, Sëiss Village, fsh. Preoc, Çagllavicë, Rruga Behar Begolli, Richard Holbrooke, Qendra Albi Mall, Rruga Shkupi, Holger Petersen, Malush Kosova, objektet individuale nga rruga Malush Kosova, deri te “kisha në Matiçan”, zonat në drejtim të zonës industriale drejtimi për Lipjan, Lagja Qershia, Lagja NIC, zona afër Xhamisë në Veternik, Matiçan drejtimi nga Pallati i Drejtësisë, fshati ndërkombëtar, Mati- rruga Muharrem Fejza me të gjitha rrugicat drejtimi deri te QKUK, rruga Enver Maloku, objektet në lagjen Kodrina, objektet Tregtia, Iliria Building, objektet e Standardit (Sociale) dhe objektet e kyçura direkt në linjat magjistrale Badovc Prishtinë, rruga Ferat Dragaj, Hajrullah Abdullahu, Hilmi Rakovica, Vllezërit Gërvalla, Afrim Zhitija, Armend Daci, Dervish Rozhaja, Thimi Mitko, pjesa e zonës “te Xhambazët”, rruga Sali Nivica, Norbert Jokl, Thimi Mitko, objektet banesore në Bregun e Diellit zonat Qendër dhe zonat e tjera afër Qendrës Tregtare në brezin rrugor Xheladin Rekaliu deri te kryqëzimi i rrugës te konviktet, zonat afër shkollës Ismail Qemali, rrugët Mehmet Gradica, Hyzri Talla, Qamil Bala.