Caktimi i 15 prillit si datë për konstituimin e legjislaturës së nëntë të Kuvendit të Kosovës, ka nxitur kryetarin e LVV-së, Albin Kurti që të nis diskutimet për formimin e qeverisë.
Këto diskutime Kurti po i kryen me partitë politike nga pakicat.
Gjatë të mërkurës, Kurti takoi kryetaren e Partisë së Re Demokratike, Emilija Rexhepi, e pas saj edhe kryetarin e Partisë për Liri, Drejtësi dhe Mbijetesë, Nenad Rashiq.
Në një përgjigje për Telegrafin, kryetarja e NDS-së, Emilija Rexhepi ka rikonfirmuar mbështetjen e saj që Albin Kurti të jetë kryeministri i ardhshëm.
“Ne vazhdojmë bashkëpunimin tonë edhe në qeverinë e re dhe e mbështesim z.Kurti për kryeministër të qeverisë së re”, ka thënë Rexhepi.
E pyetur nëse kanë ndonjë kusht që të jenë pjesë e qeverisë së ardhshme, Rexhepi u shpreh se “mbështesin çdo gjë që është në interes të qytetarëve”.
“Gjithçka që është në interes të të gjithë qytetarëve të Kosovës ne e mbështesin nisur nga politika sociale, arsimi, përdorimi i gjuhëve zyrtare, pastaj reformat në shëndetësi, mbështetjen përmes granteve dhe subvencioneve të ndryshme të qeverisë deri te punësimi i boshnjakëve, zhvillimi ekonomik dhe hapja e fabrikave në vendet ku jetojmë”, ka thënë Rexhepi për Telegrafin.
Në njoftimin për media nga Zyra e Kryeministrit u tha se gjatë takimit të sotëm Kurti e falënderoi Rexhepin për bashkëpunimin e frytshëm, rezultatet e arritura gjatë këtij mandati dhe punët e mbara që na presin në katërvjeçarin e ardhshëm.
Ndryshe, këto takime janë mbajtur në Zyrën e kryeministrit, ani pse Kurti është edhe kryetar i Lëvizjes Vetëvendosje.
KQZ-ja certifikoi rezultatet përfundimtare më 27 mars dhe sipas tyre LVV-ja ka fituar 48 ulëse, PDK-ja e dyta me 24 ulëse, LDK-ja 20 dhe koalicioni AAK-Nisma 8 ulëse.