Qendra Klinike Universitare e Kosovës ka njoftuar se mbrëmë ka ndërruar jetë një pacient nga komuna e Prizrenit dhe sot në mëngjes kanë vdekur edhe dy pacientë tjerë të prekur me koronavirus dhe që kishin sëmundje tjera përcjellëse.
Kujtojmë se numri i përgjithshëm i të vdekurve që nga rasti i parë më 13 mars ka arritur në 47.
Ndërsa bazuar në raportin e ditës së sotme në Klinikën Infektive janë të hospitalizuar 97 raste Covid -19 pozitivë, njofton Klan Kosova
Ky është njoftimi i plotë:
Bazuar në raportin e datës 27.06.2020, në Klinikën Infektive të Qendrës Klinike Universitare, janë të hospitalizuar 97 raste Covid -19 pozitiv.
45 raste janë duke u trajtuar në reparte me oksigjenoterapi dhe përkujdesje intensive.
Në repartin e Mjekimit Intensiv janë duke u trajtuar 5 raste, 2 raste janë në gjendje të rëndë duke u trajtuar me oksigjenoterapi dhe përkujdesje intensive, si dhe 3 raste janë në gjendje kritike me frymëmarrje të asistuar me respiratorë
Mbrëmë në Klinikën Infektive ka ndërruar jetë pacienti J.N. 1963 nga komuna e Prizrenit si dhe sot në orët e hershme të mëngjesit ka ndërruar jetë pacienti R. B. 1942 nga komuna e Prizrenit, të cilët përveç infeksionit me Covid -19 kishin edhe sëmundje shoqëruese.
Sot, në orën 08:15, ka vdekur pacienti me inicialet D.N, viti i lindjes 1949 nga Suhareka, i cili ishte pranuar në Njesinë Intensive në objektin e Mjekesisë me datën 23.06.2020, si transfer nga Klinika Infektive, i konfirmuar me strisho pozitive për COVID-19.