Sekretari i Zyrës Ndërlidhëse të Kosovës në Serbi, Fatmir Haxholli, ka paralajmëruar se Serbia ka shkelur marrëveshjen e Brukselit dhe ka ndërprerë sigurimin fizik të tij si diplomat.
Haxholli këtë e ka bërë të ditur përmes një postimi në rrjetin social “Facebook” duke thënë se nuk po mbrohet më as me Marrëveshjen e Brukselit si instrument ndërkombëtar.
“Dëshiroj të ndaj publikisht se në shkelje flagrante të marrëveshjes së Brukselit, Serbia ka ndërprerë sigurimin fizik 24/7 për mua si zyrtar/diplomat dhe gjithashtu nuk ofron siguri mobile, pavarësisht ankesave dhe kërkesave, kjo praktikë vazhdon. Çfarëdo që mund të më ndodhë gjatë shërbimit tim në Serbi – ndër të tjera – është përgjegjësi e drejtpërdrejtë e Serbisë!”. ai shkroi.
Haxholli e ka cilësuar këtë veprim si precedent të rrezikshëm.
“Natyrisht që këtij shteti nuk i përshtatet asnjë prezence diplomatike të Republikës së Kosovës në Beograd dhe aq më pak ngritja e statusit diplomatik siç parashikohet në marrëveshjen e njohjes de facto”, ka thënë ai duke shtuar se Kosova nuk duhet të pranojë. kamuflimi i veprimeve ndaj zyrës nga institucionet e këtij vendi, me potencial rreziku dhe ekspozimi fizik e juridik”.
Nuk është hera e parë që Haxholli ka alarmuar për mungesën e sigurisë në Serbi. Në fund të shtatorit, ky diplomat e cilësoi shtetin serb si më të pasigurtin dhe më të rrezikshmin për kosovarët, pas lajmit se një 19-vjeçar nga Kosova humbi jetën si pasojë e goditjes me thikë në pikën kufitare Serbi-Kroaci.