Motra e gruas e cila u vra mbrëmë para Gjinekologjisë në Prishtinë, ka thënë se dhëndëri i tyre, vazhdimisht i ka kërcënuar të gjithë familjen me armë zjarri.
Ajo ka akuzuar institucionet e vendit për mosveprim.
Sipas saj, i dyshuari e ka vrarë gruan me armë me shurdhues, pas kokës.
“Një herë e ka qëlluar, e ka rrëzuar, e më pas e ka qëlluar edhe herë të tjera dhe e ka vrarë. Motra ka pasë sot me lindë”, ka thënë ajo.
Ajo tregoi më tej se dy javë pas martesës së motrës, kjo e fundit kishte treguar se burri i saj dhe familja e tij po ushtrojnë dhunë fizike. Ndërkohë ka kërkuar që ta kthejnë në familje, por ai nuk e ka lejuar duke e kërcënuar me armë vazhdimisht, tha ajo.