Kandidati për kryeministër nga PDK-ja, Enver Hoxhaj, ka qëndruar sot në Pejë ku ka prezantuar planin e rimëkëmbjes.
Hoxhaj nga atje ka thënë se nëse qeveria do të udhëhiqet nga ai do të krijojë lehtësira për bizneset private në vend.
Ai ka theksuar se PDK-ja i sheh bizneset si partnerë dhe në planin e rimëkëmbjes parashihet se sektori privat do të mbështetet me fond prej 1 miliard eurosh, ku 500 milionë euro janë të dedikuara për bizneset.
Hoxhaj ka premtuar se me të kryeministër do të rritet edhe paga minimale nga 170 në 300 euro.
“Sot kam qenë në Komunën e Pejës ku vizitova industrinë e tekstilit dhe industrinë ushqimore dhe kjo flet që në Kosovë do të duhej të mbështetej shumë prodhimi i brendshëm sa për treg të brendshëm, po aq edhe për treg të jashtëm. Ne do të ofrojmë lehtësira fiskale dhe mbështetje konkrete përmes granteve, meqë një pjesë e ndërmarrjeve janë goditur për shkak të pandemisë. Sektori privat do të jetë njëri prej prioriteteve kryesore të Qeverisë që do ta udhëheq unë pas 15 shkurtit”.
