Dy persona janë arrestuar pasi dyshohen se kanë lidhje me disa raste të vjedhjeve të rënda të ndodhura nëpër disa xhami në fshatrat e Lipjanit.
Sipas policisë, rastet ishin denoncuar përgjatë vitit 2024 dhe 2024, ku dyshohej se të njëjtit kishin vjedhur gjësende të ndryshme e në disa raste kishin dëmtuar dhe asgjësuar edhe pasuri në objektet e xhamive.
“Që nga deponimi i denoncimeve, policia në vazhdimësi ka ndërmarrë një varg veprimesh hetimore e operative me qëllim të ndriçimin e rrethanave të ngjarjeve si dhe identifikimin e të implikuarve”.
“Progresi i hetimit të rasteve rezultoi me identifikimin dhe arrestimin e dy të dyshuarve; J. H, mashkull, 31 vjeç, shtetas i Republikës së Kosovës, si dhe, L. K, mashkull, 33 vjeç, shtetas i Republikës së Kosovës”, thuhet në njoftimin e policisë, transmeton Klankosova.tv.
Më tej, policia tha se me rekomandimin e prokurorit të shtetit, të arrestuarit janë dërguar në mbajtje për 48 orë, ndërsa ndaj tyre ka nisur hetimi për veprat penale “vjedhje”, “vjedhje e rëndë” si dhe “asgjësim apo dëmtim i pasurisë”.