Me mbi 30% të votave me postë të numëruara, përfshirë edhe votat nga vendvotimet e rregullta dhe misionet diplomatike, kanë dalë projeksionet e para për ndarjen e mandateve në Kuvendin e Kosovës.
Eugen Cakolli nga Instituti Demokratik i Kosovës ka thënë se ajo që bie në sy është një performancë tejet pozitive e Lidhjes Demokratike të Kosovës (LDK) dhe një e dobët të Partisë Demokratike të Kosovës (PDK), ndërkohë që Lëvizja Vetëvendosje (LVV) vazhdon të mbetet forcë kryesore.
Sipas të dhënave të fundit, LVV është afër sigurimit të 49 mandateve, por, siç thekson Cakolli “për ta arritur këtë, duhet të fitojë mbi 60% të të gjitha votave me postë.Ky trend është i mundshëm, por nuk është i garantuar”.
Për të shkuar më tej, sipas Cakollit LVV mund të arrijë deri në 50 mandate, nëse arrin të sigurojë një përqindje prej rreth (+) 70% të votave me postë.
“Ky skenar, ndonëse i mundur, duket vështirë i realizueshëm sipas projeksioneve të deritanishme”, ka shkruar Cakolli.
Cakolli ka shtuar se nga ana tjetër, me një trend të tillë LDK është shumë pranë mundësisë për të marrë një mandat shtesë nga PDK.
“Me një trend të tillë, LDK është vetëm disa qindra vota larg që ta marrë edhe një mandat nga PDK, dhe nëse vazhdon të performojë mirë në votat me postë, mund të arrijë 21 mandate. Nëse LDK rritet edhe më shumë, kjo mund të ndikojë në gjasat e LVV-së për të siguruar 49 mandate”, ka shkruar Cakolli.
Ai tutje ka theksuar se për PDK-në, situata është më kritike. Aktualisht, ajo ka 24 mandate, por është afër t’a humbë edhe një mandat.
“PDK është në zonë kritike midis 23, 24 dhe 25 mandateve. Aktualisht është në 24 mandate, por afër t’a humbë një. E madje, nëse LVV shkon drejt 50 mandateve, PDK mund të humbasë edhe një mandat tjetër. Për t’i pasur 25 mandate, PDK-ja duhet t’i ketë mbi 13% të votave me postë – që është gati dyfishi i përqindjes që ka tash”, ka shkruar Cakolli.
Edhe pse këto janë projeksionet aktuale, rezultati përfundimtar mbetet i hapur. Procesi i numërimit të votave po vazhdon dhe, siç theksohet, preferencat ndryshojnë në varësi të komunave.
“Në këtë fazë të fundit, çdo ndryshim i vogël në votat e mbetura mund të ketë ndikim të rëndësishëm në shpërndarjen përfundimtare të mandateve”, ka theksuar Cakolli nga IKD.